Argiro idazteko proposamenak eta
ariketak
HAEE
Gasteiz, 1997
393 orr.
Gure erakundeak ekindako bide beretik datorkigu oraingoan argitalpen
berri hau. Azken urteotan euskarak bere bidea egin du administrazioan,
eta bide hori zabaltzen laguntzera dator gure liburua. Administrazioko
langile askorentzat lagungarria izango delakoan gaude, eta baita
administraziotik kanpoko jendearentzat ere.
Edukiari dagokionez, sei atal nagusi ditu: komunikazioa, testugintza,
gramatika (Euskaltzaindiaren arauak), estilo-arazoak, administrazioko
testuak euskaratzea eta administrazio-idazkiak. Atal bakoitzean
hainbat aholku eta gomendio ematen dira, eta baita ariketak proposatu
ere, ikasitakoa praktikan jartzen laguntzeko. Helburua garbi dago:
administrazioan sortzen ditugun testuak zuzenagoak, zehatzagoak
eta argiagoak izatea. Liburu praktikoa da erabat, eta benetako
testuez eta azalpen ugariz horniturik plazaratu dugu.
Toki Administrazioari buruzko Ihardunaldia.
Administrazio-zuzenbide Publikoaren III Ihardunaldia
HAEE
Oñati, 1996
288 orr.
Jardunaldi hauek Bilbon egin ziren 1996ko otsailaren 2an. Bertara
zenbait aditu bildu ziren, eta beraiek jorratutako gaiek –jardunaldietako
izenburuak dioenez– badute zerikusirik toki-administrazioarekin
eta bere jarduerarekin. Hona hemen, jarraian, aurkeztutako zenbait
ponentzia eta komunikazio: “Udal zerbitzuetarako udal amankomunazgoen
gaur eguneko legezko egoera”, “Iharduera lizentzia udaldarraren
eragina ingurunearen babespean”, “Toki-Administrazioko
Funtzio publikoa: Hainbat arazo”, “Udal informaziora
sarbide eskubidea”.
Testu-loturarako baliabideak: euskara
teknikoa
EHUko argitalpen zerbitzua
Bilbo, 1996
224 orr.
Testu bat idazterakoan, ortografiaz, gramatikaz, etab.ez gain
beste gauza batzuk ere kontuan hartu behar dira: testu-antolatzaileak,
ideien eta parrafoen antolaketa... Hona, beraz, liburuaren gaia,
alegia, nola baliatu errekurtso horietaz testuak zuzenak, egokiak,
koherenteak eta irakurterrezak izan daitezen.
Liburuaren beste ezaugarri garrantzitsu bat egitura da. Horrela,
sei artikulu edo zatitan banatuta dago, eta artikulu bakoitza
independientea da. Azkenik, aipatu, batez ere testu teknikoak
egin behar dituztenei zuzenduta dagoela; baina, edozein kasutan
ere, edozeinentzat izan daitekeela baliagarria.
Pruebas Selectivas de Personal en
las Administraciones Públicas Vascas
HAEEko Hautaketa Zerbitzua
HAEE
Vitoria-Gasteiz, 1997
54 orr.
Administrazioko lanabesak sailaren barruan HAEEk argitaratzen
duen liburuxka honetan administrazioko langileak aukeratzeko frogak
aztertzen dira. Zuotako batek baino gehiagok jakin nahiko zuen
behin baino gehiagotan nola egiten diren hautaketa prozesuak.
Lan honetan prozesu osoa aztertzen da, eta aztertzeaz gain, zenbait
proposamen berri ere egiten dira etorkizunari begira. Liburuaren
egilea HAEEko Hautaketa Zerbitzua da, urteetan administrazioko
langileak aukeratzeko frogak bere gain hartu dituen zerbitzu bera;
ez zaio, bada, eskarmenturik falta!
Delitos contra la administración
Pública
HAEE
Vitoria-Gasteiz, 1997
523 orr.
HAEEk iaz funtzionarioen lege-hausteari buruz antolatutako ikastaroa
da liburu honetan jasotzen dena. Ikastaroan zenbait adituk hartu
zuten parte, eta guztiak ahalegindu ziren ikastaroaren edukiak
onartzear zegoen Kode Penal berriari egokitzen. Liburuak hiru
zati ditu: lehenengoa sarrera modukoa da; eta bertan, oso azaletik
bada ere, kode penaleko zenbait kontzeptu eta printzipio nagusi
aztertzen dira, beti ere, funtzionarioek egin ditzaketen lege-hausteak
kontuan hartuta. Bigarrenean, funtzionarioek egin ditzaketen lege-hausteak
aztertzen dira zehatz mehatz. Hirugarren zatian ingurugiro eta
diru-laguntza publikoen alorrean herritarren jarduera kontrolatzeko
eta baimentzeko ardura duten funtzionarioen betebeharrak eta erantzukizunak
jorratzen dira. Azkenik, eraskin modura, jurisprudentzia ere jasotzen
da.
